the hunter and the beast BY pop mie

mari aku bercerita sebuah kisah hantu lama yang berkaitan dengan abang kepada bapaku. kisah ani terjadi kian lama lah sudah ah, mungkin dalam era 50-an, masa atu abang kepada bapaku, hidup sebagai pemburu di hutan. orang dulu-dulu ani di benarkan membawa dan menyimpan senapang sebelum berlakunya pemberontakan 1962. jadinya, hidup sebagai pemburu ani keluar malam menuju ke dalam hutan untuk memburu payao (spisis pelanduk). steady yo orang dulu-dulu ani. ragat dan berani. maklumlah, alum lagi berapa ni brunei ani dulu. nada byk perkerjaan yang tersedia.

maka dalam seminggu dua kali atu keluar lah uncle ku ani bersama 2 orang yg lain, biasanya kawan-kawannya. bemalam lah dorg tu biasanya 2-3 malam lamanya. di tengah-tengah hutan tabal tu. kalau inda berilmu, jangantah harapkan menjejak kaki 5-10 meter ke dalam hutan, konpom sasat. so, abang kepada bapaku ani menuntut ilmu jua sikit lah. ilmu silat lah. entah seberapa banyak ilmunya tidak di ketahui, yang penting cukup lah untuk di bawa ke hutan atu.

biasanya bisdorang memburu di kawasan perhutanan yang masa ani perpindahan kampong katok, dulu hutan tu kawan2. banyak payao tu sana. dorang nada camping gear tu, nada temampu tu kan membali. hanya harapkan beteduh dan tidur di bawah pohon pun cukup. jadinya, satu malam, keluar memburu lah dorang ani bebatakan senapang patah. mula-mula dorang mesti memasang pukat (net) tu, untuk memerangkap payao atu, lalu berpecah lah ketiga tiga mereka untuk mencari seekor payao. sudah di jumpa payao atu, lalu di guide lah payao atu menuju kawasan berpukat atu, macam2 lah bising2 bisdorang buat tu. bunyi menghalau kucing ada, bunyi "yihaa!!" ada, macam2 lah, riuh lah hutan atu uleh bisdorang. yang penting payao atu akan terperangkap di kawan berpukat atu.

iatah, pada satu malam, ketika bisdorang berpecah atu. uncle ku ali-ali tu. seorang diri. senapang patah atu sedia sudah tu mana tau ada babi hutan. nya uncle ku, lebih ia takut babi hutan daripada hantu. namun kata-katanya atu cuma eksen saja. haha. masa ia sedang meninjau keberadaan seekor payao, dengan cuma berharapkan ketajaman deria mata dan pendengaran dalam kegelapan dan kebisingan hutan, kedengaran tia bunyi aneh. bunyi aneh ani bukan seperti bunyi yang biasa2 di dengarnya. bunyi ani seperti helaian tawa seorang perempuan.

mengikut pengalaman dan deria instinct, sesiapa pun tahu yg bunyi atu datang dari seekor hantu. konpom hantu sudah tu kalau ada bini2 ketawa dalam hutan, jangantah pikir2 lagi. naik abis bulu roma uncle ku ani, dari leher ke batis. seram sejuk di rasainya. di teraisi nya kawan2 yang lain, "oi mat! dul! mana kamu ani?! mendangaa kamu tuu?!". kali kana jawab lah oleh kawan2nya. "awo!! mendangaa kami! nda usah terais!" kedengaran sahutan mereka kira2 10 meter dari di mana uncle ku berdiri. susuk tubuh bisdorang di telan kesemakan hutan. nda nampak di lihat.

uncle ku ani pun, ambil inda peduli lah, memandangkan kawan2 nya yang lain macam steady masih.ia pun mau jua kan steady-steady ani. ia pun meneruskan peninjauan beliau, walaupun bulu roma masih tegak berdiri. semakin lama dan semakin jauh perjalanan meredah samak, makin halus pendangaran ketawa bini2 atu. semakin lama, semakin kurang lah rasa takut uncle ku ani. di pikirnya nda lagi kana kacau ia ani. jauh sudah lari hantu atu. berasa gembira, duduk ia dulu kan berehat di bawa sebuah pohon jati ani, besar dan tinggi pohon jati ani, 100 tahun sudah kali umurnya.konon kan minum kopi. lalah dan letih sudah berjalan tapi masih nada payao.

masa siuk2 menyandar sambil minum kopi arah pohon atu.... datang bebalik ketawa bini2 atu mengajut. kali ani makin basar. seolah olah sangat hampir bunyi atu. tekajut dan tepelanting kopi uncle ku ani, tarus di pasangnya senapang patah. panic ia tarus. tolehnya kiri kanan.. nada. lagipun kegelapan malam atu sangat inda menolong. langsung inda nampak apa-apa. lalu, di tolehnya ke atas pokok...kali...

nah! di sana bah hantu ah. duduk gembira lagi ia di atas dahan. tapi yang uncle ku hairan, seolah-olah ada cahaya bah yang meliatkan hantu atu arah dirinya, walaupun di kelilingi kegelapan malam. macam glow-in the dark lah. tarang dan clear usul hantu atu di liatnya.ani nah deskripsi hantu atu, seperti di katakan oleh uncle ku ani. "panjang taringnya, matanya merah, buruk muanya macam kan tekupas, rambut panjang menutup seluruh badan. kakinya.... mencecah ke tanah!"

ketawa labang2 hantu atu di atas pohon. uncle ku pun tarus menjatuhkan dirinya ke tanah, menukup dirinya macam tengiling. keadaan panic mengerumuni dirinya. nda lagi dapat baca2 ayat. baca2 mantera. kan bersuara utk memanggil kawan2nya pun nada. menangis bah uncle ku ani. abis ilang cool nya. nda apalah, bukannya ada org lain meliat. yang penting, uncle ku bepaut macam tengiling arah kawasan yang sama atu amat lama lah. dalam beberapa jam. atu pulang di cakapnya. banar atau inda, aku inda pasti.

sasak2 sudah uncle ku ani nda tahan, batah hantu atu ketawa2 di atas pokok atu, only one thing to do. di ambilnya senapangnya, lalu di tembaknya arah direction hantu atu. POWWW!!...... nah.. tarus hilang bah hantu ah. nda lagi nampak. sunyi tarus nada helai tawa yang mengerikan. bangunlah uncle ku ani, berlari ia arah tampat ia sama kawan2-nya biasa bekumpul, jangan di tanya macamana, memang handal lah uncle ku ani kalau mencari jalan di hutan.

sudah sampai ke tampat bekumpul tarus kana tanya oleh kawannya si mamat. "dari mana luah mu wang?, batah kami menunggu ni dih." reply uncle ku "aah.. bekamih ku tadi.. ". kalinya kawan2 uncle ku ani " karas kau ni Ji, kami nda tahan eh kana kacau tadi ah, tarus kami ke sini, steady kau ani eh". dalam pikiran uncle ku ani "elleeeh, steady tah karang!". sekian.